Ielts,OET or PTE?澳洲護士牌辛酸之考英文

 無錯，想移民澳洲，第一步就係～～考英文😖🔤。

之前上網睇其他人嘅blog，絕大部分都覺得整個移民過程最難嘅部分就係考英文。

嗯！咁聽落，一定覺得考到英文之後，所有嘢都會好容易，其實唔係囉！我真心講一句，考英文的確係好難，但係之後嘅文件準備等等，其實都唔易，所以小妹係度比個心理準備大家，唔好以為考完英文就萬事俱備，這只係過了最難嘅一關，之後還有好多關。而且，如果好似小妹咁，就快到年齡上限，你哋記得預留一定時間係AHPRA and ANMAC 嘅申請度，因為要好幾個月㗎……宜家小妹嘅進度，就係kick住咗係AHPRA，ANMAC 早兩日就收到通知啦！

言歸正傳，小妹其實早5至6年前就有考慮移民，只係當時香港環境，收入等等，和家人商量都係覺得留係香港好d。直到2019年尾，大化骨龍去澳洲讀書，香港嘅變化等等，又將呢個移民念頭帶番出嚟。這次家人都覺得移民值得考慮，但又唔係必要，所以決定先學好英文，年齡上限前，考到就攪，考唔到就算。所以當時沒有報ielts 考試班，反而覺得先提升英文好d就報了大型連鎖英文center嘅1年英文課程。又因為Covid-19 停課3個月，所以20年11月先讀完，而2020年這一年因著疫情和香港環境嘅關係，家人移民決心大增，小妹嘅壓力就大大提升了，不成功便成仁嗰種。然而，讀完一年英文，感覺離考試真心有點距離，而且亦唔知考試技巧，所以係20年11月尾就報咗一間小型ielts考試保證班，考唔到退錢嗰種。

所以，認認真真開始為ielts準備可以話係20年11月尾開始。而係21年1月，因為小妹有大假，又想試下自己水平，就係21年1月中報咗1次ielts，可惜我嘅分數只有5.5,6,6,6.5…當中listening 最差得5.5,而speaking 就6.5。離目標全7分嘅距離真係……無眼睇😵。不過考完呢次都有收獲嘅，就係覺得自己唔適合考ielts，因為自己串字真心差，想要listening 短時間由5.5去到7絕對做唔到，所以係認真了解過後，決定轉戰OET。

OET講真其實真係適合護士考，佢listening 比ielts絕對容易好多，因為可以講話平時都聽過下，但可惜香港無咩人教，所以就係網上平台揾了老師，上了5堂，給了自己2個月左右時間練習，4月10日考咗1次OET，只可惜今次係C+,B,B,C+，當日考完就知道listening和speaking有點危機，因為有一兩題MC自己都發現選錯了，但又唔夠時間改，又因為咁而影響了speaking 嘅表現。最傷心嘅係，今次listening 成績只差10分，即係只差1題左右😭，但明顯比ielts 好多了。但係時間線真係好趕，OET最唔好嘅係考期太少，出成績又要3星期，而且同一個id一定要出咗成績先可報第2次考試，如果要再考一次，到時又唔得，咁就真係浪費晒時間。而係同一時間，一位同事就勸我試下PTE，之前雖然有了解過PTE，但因為覺得太多題型好複雜，所以才決定OET，不過我同事覺得如果願意花時間練，PTE想要65分係可以短時間做到，而且PTE每星期都有得考，出成績又快，聽落唔錯，所以就係咁，又轉戰PTE。

PTE由5月左右開始用apps練習，沒有上補習班，6月11日考第1次，今次又係listening ，而且只係差1分，其他3 parts都達標了，就係listening 呢1分🤬😡😣😫，只好又花多$2000，係6月21日再考多次，當日12點考完，1點半就出成績。今次終於成功，全都過65，而且speaking 仲有73添，最難一步總算過了，可以去下一步申請AHPRA and ANMAC 啦～

總結一下這一年零九個月左右準備考英文嘅心得，如果連最基本Grammer 和對講英文都無信心嘅嚟講，去連鎖英文中心讀下係可以嘅，不過如果有一定英文水平，只係唔熟考試技巧，我覺得無必要花時間和金錢，好似以我自己為例，真心唔覺有太大進步。

Ielts本人覺得係最難沖7分的，OET如果有時間等成績出，係可以考1至2次達標，要花嘅時間亦唔會太多，只要平時聽下podcasts 睇多d英文戲(要開英文字幕)。而如果願意花時間練1至2個月，PTE可以話係最穩陣能達到65，而如果願意再花多點時間，相信79都係有可能達到的。